ТОШКЕНТ, 12 авг - Sputnik. Истанбулда озиқ-овқат бўйича келишувга эришилгандан сўнг Украинани тарк этган биринчи донли кема Razoni Туркиянинг Мерсин портидан чиқиб, Миср томон йўл олди. Бу ҳақда MarineTraffic маршрутни кузатиш хизмати маълумотларига асосланиб хабар берилган.

Кеча, 11 август куни кема Туркиянинг Мерсин портига кирди. Мерсиндаги Toros юк ташиш компанияси раҳбари Қодир Сойер қуруқ юк ташувчи кемадан 1500 тонна дон туширилишини, шундан сўнг кема Мисрга йўл олишини айтди.

MarineTraffic маълумотларига кўра, кема аллақачон портни тарк этган ва жанубга Миср томон йўл олган.

Маълумот учун, Razoni кемаси Ливанга 7 август куни эрталаб етиб бориши керак эди. Бироқ 8 август куни Украинанинг Ливандаги элчихонаси ливанлик мижоз Одессадан қуруқ юк кемасида жўнатилган донни етказиб бериш муддати беш ойдан ортиқ кечикканлиги сабабли уни рад этганини маълум қилди. Юборувчи муқобил харидорларни, шу жумладан Ливандан ташқаридаги харидорларни кўриб чиқаётгани хабар қилинган эди.

Эслатиб ўтамиз, 22 июль куни Истанбулда Россия маҳсулотларини экспортга етказиб беришдаги чекловларни бекор қилиш ва Украина донини экспорт қилишда Россиянинг ёрдами бўйича кўп томонлама битимлар имзоланди. Россия, Туркия, Украина ва БМТ вакиллари томонидан имзоланган битим Украина ғалласи, озиқ-овқат ва ўғитларини Қора денгиз орқали учта портдан, жумладан Одессадан экспорт қилишни назарда тутади.