30-martdan boshlab Markaziy bank “Yangi Oʻzbekiston” va “Navroʻz” turkumidagi esdalik tangalarini sotuvga chiqarmoqda. Bu haqda regulyator matbuot xizmati yozmoqda.

Kumush tangalar 50 000 soʻm nominalda muomalaga chiqarilgan va ogʻirligi 31,1 gramm. Oltin tangalar ogʻirligi 15 va 20 gramm, nominal qiymati 100 000 soʻmni tashkil etadi.

Esdalik tangalarni tijorat banklari filiallarida ham naqd, ham bank oʻtkazmasi orqali xarid qilish mumkin. Shuningdek, xaridorlar sotib olingan tangalar uchun haqiqiylik sertifikatini oladi.

Tangalarni qayta sotib olish belgilangan tartibda ularning sotuvi tashkil etilgan banklar tomonidan amalga oshiriladi (Spot ushbu mavzu boʻyicha material eʼlon qilgan).

Markaziy bank 2018-yilda aholiga esdalik oltin tangalarni, ikki yildan soʻng esa oltin quymalarini sotishni boshladi. Yakka tartibdagi xaridorlarga shartlar asosida ularni Oʻzbekistondan olib chiqishga ruxsat berildi.

Bu qadamlar Oʻzbekiston iqtisodiyotining xorijiy valyutaga, xususan, dollarga qaramligini kamaytirish istagi bilan izohlandi. Bundan tashqari, ekspertlarning fikricha, oltinga kirish investitsiya imkoniyatlarini kengaytiradi va jamgʻarmalarni taʼminlashga yordam beradi.

Markaziy bank raisi oʻrinbosari Bobir Abubakirovning soʻzlariga koʻra, 2021-yil sentyabrigacha oʻzbekistonliklar 5100 ta quyma va 2500 ta tanga sotib olgan. Ulardagi oltinning umumiy hajmi 168,6 kg ni tashkil etdi.

Tangalar va quymalarning narxi har kuni Markaziy bank tomonidan oltinning jahon kotirovkalaridan kelib chiqqan holda belgilanadi va eʼlon qilinadi. Shunday qilib, fevral oyining oxiri — mart oyining boshida, Ukrainadagi vaziyat va Rossiyadagi iqtisodiy notinchlik fonida, oltin tangalar va quymalar deyarli 10% ga qimmatlashdi.

Spot avvalroq 2022-yilning dastlabki ikki oyida Oʻzbekiston eksportining yarmidan koʻpini oltin taʼminlagani haqida xabar bergan edi.