Yagona portal orqali avtomobil tarixi haqida ma’lumotnoma olish xizmati mavjud. Bu xizmatdan esa avtomobil sotib olish istagida bo‘lgan har bir odam foydalanishi mumkin.

Mazkur xizmat orqali onlayn ravishda avtomobil kimning nomida, qachon ishlab chiqarilgan va texnik holati qanday ekanligiga oid ma’lumotlarni olish imkoni mavjud.

Xizmatdan foydalanish uchun portalda albatta shaxsiy sahifa bo‘lishi kerak. “Spot” avvalroq qanday qilib Yagona portalda ro‘yxatdan o‘tish mumkinligi haqida qo‘llanmani taqdim etgandi.

Qidiruv tizimiga “Avtomobil tarixi haqida ma’lumotnoma” kalit so‘zlarini kiritish orqali kerakli sahifani topish mumkin.

Undan foydalanish uchun hech qanday hujjat talab etilmaydi. Xizmat pullik amalga oshirilib, Yagona portal orqali ariza jo‘natish narxi 29 700 so‘mni tashkil etadi.

“Xizmatdan foydalanish” tugmasini bosgach yangi sahifa ochiladi va unda keltirilgan ma’lumotlarni to‘ldirish zarur.

Xususan, shaxsiy ma’lumotlardan so‘ng, avtomobilning identifikator va davlat raqami, texnik pasport seriyasi hamda raqamini kiritish kerak.

Keyingi tugmasini bosgach esa to‘lov shakli ochiladi va invoys bo‘yicha to‘lovni amalga oshirish mumkin.

Shuningdek, to‘lov qilingach, avtomobil haqidagi ma’lumotlar shakllanadi.

Undan havola orqali foydalanish mumkin.

Avvalroq “Spot” tonirovka uchun ruxsatnomani qanday onlayn olish mumkinligi haqida qo‘llanmani taqdim etgandi.