Шу ёзда эркин агентга айланаётган футболчилар рўйхатида — Чемпионлар лигасида ғолиб чиққан қатор футболчилар бор.

Бу мавсум ҳали якунланмади, аммо ҳозирданоқ эркин агентга айланадиган қатор футболчилар номи аниқ. Бундай футболчиларнинг шартномалари муддати расман июн ойида якунланади, аммо уларнинг клублари аллақачон ушбу футболчилар мавсум якунида жамоани тарк этиши ҳақида эълон қилишган. Шартномаси муддати тугаётган яна бир қанча футболчилар эса шартномасини янгилаши деярли аниқ. Шу билан бирга, клубида қолиш-қолмаслиги мавҳум бўлиб турган футболчилар ҳам бор.

Кетиши аниқ

Лионел Месси, 35 ёш, «ПСЖ»

Аргентиналик футболчининг Саудиянинг «Ал-Ҳилол» клубига ўтиши ҳақидаги хабарлар — йилнинг асосий мавзуларидан бирига айланди. Араблар унга Европа билан хайрлашиб, Криштиану Роналду билан дуэлни қайта бошлаши учун йилига 400 миллион евро таклиф қилишмоқда.

«ПСЖ» ҳам ўтган ойдаги можародан кейин уни олиб қолишга ортиқча ҳаракат қилмади. Парижликлар клуби бош мураббийи Кристоф Галте 3 июн куни Франция чемпионатининг 38-тури доирасида «Клермон»га қарши кечадиган ўйин Месси учун клубдаги сўнгги ўйин бўлиб қолишини маълум қилди. «Футбол тарихидаги энг яхши ўйинчини бошқариш шарафига муяссар бўлдим. «Клермон»га қарши ўйин Мессининг «Парк де Пренс»даги сўнгги учрашуви бўлади. Ишонаманки, Лионелни стадион ўзгача тарзда кутиб олиб, чиройли хайрлашади», деди у.

Месси «ПСЖ» сафида 2021 йилдан буён ўйнаб келаётганди. Ўтган вақт ичида у клуб учун 74 ўйинда майдонга тушиб, 32 гол урди ва 35 голли узатмага муаллифлик қилди. Унинг шартномаси жорий йил ёзига қадар тузилганди. Айни вақтда унда «Барселона»га қайтиш варианти ҳам йўқ эмас.

Роберто Фирмино, 31 ёш, «Ливерпул»

Ҳозирги «Ливерпул»ни Фирминосиз тасаввур қилиш осон эмас. Бразилиялик форвард футболчилик фаолиятининг энг яхши давриини - саккиз йилни «Энфилд»га бағишлади: «Ливерпул»да у Англиядаги барча турнирларда ғолиб чиқди, 2018/2019 йиллар мавсумида ЕЧЛ кубогини қўлга киритди, аммо сўнгги вақтларда захира футболчисига айланиб қолди. Қишда у жароҳат туфайли бир ярим ой майдонга туша олмади, баҳорда эса АПЛнинг олти ўйинида қайдномага киритилмади. Шунга қарамай, у лигада 11 гол уришга эришди.

Май ойида «Ливерпул» бразилиялик футболчиси шартномасини узайтирмагани ва клубни тарк этишини эълон қилди. Фирмино жамоа билан идеал даражада хайрлашди. Аввалига АПЛнинг сўнгги икки турида гол урди. Кейин «Ливерпул»даги жамоадошлари, клуб ходимлари, дўстлар ва оила аъзолари учун совғалар солинган 200 қути тайёрлаб тарқатди. Роберто ҳали топ-даражада бир неча йил ўйнаши мумкин: бразилиялик ҳужумчига «Барселона» ва «Интер» қизиқмоқда.

Жеймс Милнер, 37 ёш, «Ливерпул»

Англиялик футболчи шу ёшида ҳам талабгир бўлиб қолмоқда. Милнер «Ливерпул»дан кетиши икки ҳафта олдин маълум бўлди, аммо у кўп вақт бекор қолмади. Ушбу фахрий футболчи яқин вақтлар ичида «Брайтон» билан шартнома имзолаши кутилмоқда, ўз тарихида илк бор еврокубокларга чиққан ушбу жамоага тажрибали яримҳимоячи керак. Жеймс саккиз йил «Ливерпул» учун жон куйдириб ўйнади (332 ўйин), «Энфилд» ходимлари эса унга оригинал совға тайёрлашди.

Клуб афсонаси билан хайрлашув вақтида унга стадион газонидан бир парча ажратиб беришди. Айнан пеналти тепиладиган нуқтадан. Милнер саккиз йил мобайнида 11 метрлик жарима зарбаларини амалга ошириб келган ва «Энфилд» ходимларига доим иш топиб берган. Стадион ходимлари ҳар сафар бу жойни янгилашига тўғри келган. «Қадрли Жеймс, пеналти нуқтаси учун энди ўзинг қайғурасан», — дейилган газон парчасига қўшиб берилган ҳазил откриткада.

Наби Кейта, 28 ёш, «Ливерпул»

Инглиз клуби ушбу яримҳимоячини 2018 йил ёзида катта маблағ сарфлаб сотиб олганди. Африкалик футболчи трансфери «Ливерпул»га 60 млн еврога (Transfermarkt маълумоти) тушган. Милнер ва Фирминодан фарқли ўлароқ, Кейта «Ливерпул»да яхши ўйнаб кета олмади. 2022/2023 йиллар мавсуми Наби учун жуда ёмон ўтди. У мавсумнинг биринчи қисмини жароҳатлар туфайли ўтказиб юборди, иккинчи даврада эса барча турнирлар доирасида атиги 13 ўйинда майдонга тушди (жами 487 дақиқа). Таққослаш учун — ўтган мавсумда Кейта 40 ўйинда майдонда бўлган (2088 дақиқа). ОАВдаги хабарларга кўра, Наби фаолиятини «Барса» ёки «Милан»да давом эттиришга яқин.

Серхио Бускетс, 34 ёш, «Барселона»

Кўк-анорранглилар клубини Гвардиоланинг шонли жамоасининг сўнгги рамзи ҳам тарк этмоқда. У каталонияликлар клубининг ёшлар жамоасида тер тўккан, икки жамоа учун ўйнаган, 2008 йилдан буён 15 мавсум давомида асосий таркибнинг алмаштириб бўлмас футболчиси бўлган. Серхио «Барса» учун 722 ўйин ўтказган. Клуб 34 ёшли футболчига бу мавсумда ҳам ишонч билдирди ва у 42 ўйинда майдонга чиқиб, клубдаги фаолиятини юқори нотада якунлади. Бу мавсумдаги чемпионлик Серхио учун каталонияликлар сафидаги 32-соврин бўлди. Бундан кўпроғи фақат Мессида (35).

Молиявий масалалар барчасидан муҳимроқ бўлиб чиқди. Бускетснинг клубдаги аҳамиятини «Барселона» бош мураббийи Хавининг сўзлари ҳам кўрсатиб турибди. У Серхиога ўринбосар топиш клуб учун ёзги трансферлар ойнасидаги устувор вазифа эканини айтди. Энди кўк-анорранглиларга юқори даражадаги таянч яримҳимоячиси керак. Бускетс эса фаолиятини якунлаётгани йўқ: Mundo Deportivo газетаси ёзишича, испаниялик футболчини Саудия Арабистони ва АҚШдаги клублар ўзига чорламоқда.

Жорди Алба, 34 ёш, «Барселона»

Албанинг рақамлари Бускетсникидан камтарроқ, аммо у ҳам «Барса» афсонаси деб аталишга ҳақли. Нима бўлганда ҳам Жорди жамоа учун 11 йил ўйнаб берган (459 ўйин) ва 18 соврин қўлга киритган. Бу мавсумда ҳам 30 ўйинда иштирок этди. Испаниядаги инсайдерлар хабар қилишича, Алба клубнинг каттагина қарзидан кечган, у бу пулларни бонус сифатида олиши керак эди.

Лионел Месси Албанинг кетишига муносабат билдирди ва унга бўлажак клубида муваффақият тилади. Жордининг шартномасида келишувни яна бир йилга узайтириш бўйича банд бўлган, аммо томонлар келишган ҳолда хайрлашган. Mundo Deportivo маълумотига кўра, футболчи фаолиятини давом эттириши учун вариантлардан бири — «Атлетико» клуби бўлиб турибди.

Лукас Моура, 30 ёш, «Тоттенҳэм»

Бразилиялик футболчи «ПСЖ»дан келганида беш ярим йил ўтиб Лондон клубини тарк этмоқда. 2019 йилда Моура Чемпионлар лигасида ўзининг энг ёрқин ўйинини ўтказганди. Унинг яримфиналда «Аякс»га қарши жавоб ўйинидаги голлари рақибни шокка туширганди (3:2). Лондонликлар ўшанда биринчи ўйинда ўз уйида 0:1 ҳисобида ютқазишган, жавоб ўйинининг биринчи бўлимида иккита гол ўтказиб юборганди, кейин эса фақат Моура гол уради. Унинг учинчи голи «Аякс»ни таслим этади — амстердамликларда энди жавоб қайтариш учун куч ҳам, вақт ҳам қолмаганди. Якунланган мавсумда Моура аввалига жароҳат туфайли ўйнай олмади, иккинчи даврада эса унга жуда кам имконият берилди.

Рафаэл Геррейру, 29 ёш, «Боруссия» Д

Етти йил муқаддам дортмундликлар клуби уни камтаргина «Лорьян»дан олиб келиш учун 12 млн евро сарфлашганди. Томонларда хайрлашув учун фантастик лаҳзалар бўлиши мумкин эди. «Боруссия»ни узоқ кутилган чемпионликдан 90 дақиқа ажратиб турганди, аммо ўйин якунлангандан кейин барча футболчилар алам билан газонга йиқилишди.

Кейинги куни Геррейру клуб билан хайрлашди ва кўз ёшларини тийиб тура олмади. Умуман олганда, Геррейру жуда кучли мавсум ўтказди — 36 ўйинда 6 гол ва 14 пас. WhoScored портали португалиялик ҳимоячини Бундеслигада мавсумнинг рамзий жамоасига киритгани бежиз эмас.

Милан Шкриняр, 28 ёш, «Интер»

Шкриняр — эркин агентга айланиши мумкин бўлган футболчилар орасида энг қимматбаҳоси: Transfermarkt ҳимоячининг трансфер қийматини 60 миллион еврога баҳолаган. Албатта, бу мавсум икки ойдан ошиқ вақт майдонга туша олмаганига қарамай, Шкриняр талаб бор. Катта эҳтимол билан, словакияликнинг кейинги клуби «ПСЖ» бўлади.

Юри Тилеманс, 26 ёш, «Лестер»

Тилеманс «Лестер»ни ўтган йил ёзида тарк этиши кутилганди — «Арсенал» ушбу белгияликни трансфер қилишга қаттиқ уринган, аммо келишув барбод бўлганди. Энди барчаси ҳал бўлган: «тулкилар» АПЛда қола олмади ва уларнинг асосий активларидан бири текинга кетади. Қаергалиги — ҳозирча аниқ эмас. «Арсенал» ҳозирча бу вариантга қайтмади, аммо белгиялик футболчига лондонликлар клубида унга иш топилиши аниқ.

Маркус Тюрам, 25 ёш, «Боруссия» М

Лилиан Тюрамнинг ўғли бундеслигада порлаганига бир неча йил бўлди ва у аллақачон Менхенгладбаҳнинг «Боруссия» клуби даражасидан ўзиб кетган. Клуб аллақачон француз ёзда кетишини эълон қилди, аммо ҳозирча унинг кейинги манзили аниқ эмас: даъвогарлар — «Интер», «Бавария» ва АПЛ клублари.

Кетиши мумкин

Карим Бензема, 35 ёш, «Реал»

«Олтин тўп» соҳиби «Реал» билан шартномасини яна бир йилга узайтириши ҳал бўлгани ҳақида хабарлар бор эди, аммо сўнгги кунларда вазият жиддий ўзгарди.

Бензема Саудия Арабистони клубидан таклиф олган: иилига 200 млн евродан тўлашни назарда тутувчи икки йиллик шартнома (солиқлар чиқариб ташланганда). «Реал»дагилар Бензема клуб билан хайрлашиш ҳақида жиддий ўйламоқда, деб ҳисобламоқда. Мадрид клуби ичидаги вазиятдан яхши хабардор бўлган AS хабарида у «кетишга яқин» экани айтилган. «Реал» раҳбарияти ёши ўтиб бораётган Каримнинг кетишига тўсқинлик қилмайди, қолаверса, у Европа жамоасига кетаётгани йўқ.

Жорий мавсумда «Реал» сафида у жами 42 ўйинда 30 гол уриб, 6 голга узатма берди. Лекин унинг йиллик маоши ҳам кам эмас - бонуслардан ташқари 13,2 млн евро. 

Лука Модрич, 37 ёш, «Реал»

Тони Кроосдан фарқли равишда, Модричнинг Мадриддаги келажаги ноаниқлигича қолмоқда. Бу мантиқий: хорватиялик яримҳимоячи германиялик жамоадошидан тўрт ярим ёш катта ва бу мавсумда ундаги ўйин амалиёти сезиларли даражада қисқарди. Аммо ҳали ҳам хорватиялик футболчи «Реал»да яна бир мавсумга қолиши, кейинги йилда кетиши ҳақида маълумотлар бор.

Серхио Рамос, 37 ёш, «ПСЖ»

Модрич билан бўлганидек, Рамоснинг шартномасини янгилашига ёши тўсиқ бўлмоқда. Аммо испаниялик футболчининг ўзига хос устунликлари ҳам бор: у бу мавсумда кўпроқ ўйнади ва унинг жамоа ўйинига таъсири кенгайди. «ПСЖ» бундай тажрибали футболчини таркибда сақлаб қолишдан манфаатдор.

Анхел Ди Мария, 35 ёш, «Ювентус»

Ди Мария жаҳон чемпионатида Аргентина учун муҳим фигура бўлганди, аммо унинг «Ювентус»даги ўйини барқарор бўлмади. У айрим баҳсларда порлади, масалан, Европа Лигасида «Нант»га қарши ўйиндаги ҳет-триги билан жамоани кейинги босқичга олиб ўтди, аммо Ди Мария ички чемпионатда ҳамиша ҳам ёрдам бера олмади. Қолаверса, аргентиналикнинг ўзи ҳам ватанига, «Росарио Сентрал» клубига қайтишни истамоқда — энди унда жаҳон чемпионати учун Европада ўйнашга зарурат йўқ, шундай экан фаолиятининг охирги йилларини уйда ўтказиш мумкин.

Илкай Гундўған, 32 ёш, «Манчестер Сити»

Яқин вақтларгача «Манчестер Сити» сардори ёзда «Барселона»га ўтиши ҳал бўлган масаладек кўринаётганди — немис футболчисининг шартномаси муддати тугаяпти, каталонлар эса унга асосий таркибда жой беришга тайёр. Аммо Гундўғаннинг мавсум охиридаги ёрқин ўйинлари, шунингдек Калвин Филлипс яхши формада эмаслиги «Сити»ни қайта ўйлаб кўриб, ҳавбекни сақлаб қолишга ундаши мумкин.

Қолиши деярли аниқ

Нголо Канте, 32 ёш, «Челси»

Бутун мавсум ушбу французнинг бошқа йилларидан бутунлай фарқлича кечди — у жаҳон чемпионатини ўтказиб юборди ва «Челси»нинг қулашини бир четда туриб кузатишга мажбур бўлди. Бу йил лондонликлар амалдаги футболчиларига эмас, янги харидларга кўпроқ эътибор қаратди, Кантенинг соғлигидаги муаммолар эса музокаралар жараёнини янада мураккаблаштирди. Аммо у иккинчи даврада майдонга қайтди, «Челси»нинг янги эгалари ҳам ушбу французнинг жамоага кераклигини ҳис қилишмоқда ва унга янги шартнома таклиф этиши тайин.

Давид Де Хеа, 32 ёш, «Манчестер Юнайтед»

Испаниялик дарвозабон 12 йилдан буён «Олд Траффорд»да. «МЮ»ни Де Хеасиз тасаввур қилиш қийин, аммо унинг позицияси ҳозир унчалик мустаҳкам эмас. Шунга қарамай, «Юнайтед» дарвозабон билан шартномани узайтирмоқчи, лекин ҳозирча янги шартлар уни қониқтирмаяпти. Катта эҳтимол билан, якунда томонлар тил топишиб олишади.

Тони Кроос, 33 ёш, «Реал»

Кроос — Модрич — Каземиро триоси бир йил ичида тарқалиб кетди: бразилиялик аллақачон «МЮ»да. Энди хорватиялик ва немис яримҳимоячилар келажаги ҳам мавҳум бўлиб турибди, уларнинг иккисининг ҳам шартномаси муддати шу ёзда тугайди. Лекин Крооснинг вазияти осонроқ: катта эҳтимол билан «Реал» у билан шартнома узайтирилганини эълон қилади. Германиялик футболчи фаолиятини Мадридда якунлашни мақсад қилган.