• 10830.17
  • 11391.17
  • 203.96
weather Тошкент: +24.7°C
Detail image

«Дарё»да «Дунё бўйлаб» телеканалининг руслаштирилиши ҳақидаги мақола эълон қилингач, мазкур ҳолат жамоатчиликни қизиқтирди ва кўплаб муҳокамаларга сабаб бўлди.

Қувонарлиси мазкур воқеага Ўзбекистон Журналистика ва оммавий коммуникациялар университети проректори Нозима Муратова биринчилардан бўлиб муносабат билдирди.

Нозима Муратова.

Фото: «Дарё» / Дилруҳ Исомиддинова

«‘Дунё бўйлаб’ канали эфирини рус тилида ташкил этиш масаласида икки хил позиция бор. Бугун бутун дунёда одамларнинг ёлғон ахборот таъсирига тушиб қолиши масаласи энг оғриқли масалалардан бири экани тан олинган. Ва айнан нотўғри тарғибот орқали оммани бошқариш ҳолати кузатилаётганини ҳам инкор этиб бўлмайди», — дейди Ўзбекистон Журналистика ва оммавий коммуникациялар университети проректори Нозима Муратова.

Университет проректорининг айтишича, аввалроқ интернет журналистикани ривожлантириш учун ўзбек тилида материаллар беришга эътибор кучайиши кераклиги хусусида кўп гапирилган.

«Аввалроқ интернет журналистикаси ривожи учун ахборотлар ўзбек тилида бўлиши керак дегандик, бугунги кунга келиб дунё тилларида ахборот етказишда оқсоқлик борлиги сезилиб қолди. Балки ‘Дунё бўйлаб’ каналининг янги концепцияси бунга туртки бўлар», — дейди проректор «Дарё» билан суҳбатда.

Нозима Муратовага кўра, бугун Ўзбекистон халқида рус тилида ахборот берувчи каналга эҳтиёж бор.

Нозима Муратова.

Фото: «Дарё» / Дилруҳ Исомиддинова

«Бугун дунё халқлари Ўзбекистон ҳақида дунё тилларидан бири орқали ахборот олиши керак. Ва бу шарт. Тўғри, ўзбек тилидаги ахборотлар дунё тиллари орқали таржима қилиниб, хорижликларга ҳам етказиляпти. Аммо улар ҳақиқий ҳолатни қай даражада томошабинга етказяпти ва буни қай даражада уддаламоқда. Шунингдек, айнан томошабин учун қайси жиҳатлар ва қайси гапларни таржима қиляпти? Нега энди биз дунё тилларидан бирида хорижликларга ахборот етказиш имконимиз бўла туриб, бундан фойдаланмаслигимиз керак?», — дейди суҳбатдош.

Нозима Муратованинг айтишича, дунё халқлари дунё тиллари, нафақат рус тилида, балки инглиз тилида ҳам ўзбекистонликлар ҳақида, Ўзбекистон туризми ҳақида кўрсатувлар кўриши керак. Ва бу айнан ўзбек туризмининг ривожланишига туртки беради.

Суҳбатдош «Дунё бўйлаб» канали ижодкорларининг томошабинни йўқотиб қўямиз деган қўрқуви асосли эканини таъкидлаб, журналистларнинг ўз ишини давом эттириши учун имконият яратиб берилиши керак демоқда.

«Журналистлар мисқоллаб йиғган аудиториясини бир қарор билан йўққа чиқариш ҳам хато. Балки, МТРК раҳбарияти бу ҳақда бош қотираётгандир», — дейди Нозима Муратова.

Журналистларни тайёрловчи даргоҳ вакили ўзбек томошабинлари туризмга алоқадор кўрсатувларни ўзбекча талқинда кўришга ҳақли эканини таъкидлаб, бу имконият бошқа каналлар имконияти орқали ҳал этилиши керак деган фикрни илгари сурмоқда.

«Биз юзага келган вазиятни имконият деб қабул қилиб, юзага келаётган ҳолатларни бошқа имкониятларимиз орқали ҳал этишга уринсак, бу янгилик бизга имконият бўлади. Бунга муаммо сифатида қарасак, албатта бу бизга ечими йўқ муаммо бўлиб қолади», — дейди Нозима Муратова.

Нозима Муратова.

Фото: «Дарё» / Дилруҳ Исомиддинова

Вазирлар Маҳкамасининг Маънавият ва давлат тилини ривожлантириш масалалари департаменти мудири лавозимига тайинланган Собир Шукуров «Дарё»нинг мазкур масаладаги саволларига ҳозирча жавоб беролмаслигини, эндигина лавозимига киришганини маълум қилди.

«Дарё» воқеалар ривожини кузатишда давом этади.

Ўхшаш янгиликлар