Европа Иттифоқи давлатлари 12 декабрь куни Брюсселда бўлиб ўтадиган ташқи ишлар вазирларининг учрашуви олдидан Россияга қарши санкцияларнинг тўққизинчи пакети бўйича келиша олмади, муҳокама давом этмоқда. Бу ҳақда Европа дипломатияси раҳбари Жозеп Боррел маълум қилди.

«Европа Иттифоқи кенгашининг ушбу йиғилиши жуда узоқ ва қийин бўлади. Кун тартибида Россияга қарши санкцияларнинг тўққизинчи пакетини тасдиқлаш бор. Биз ҳали ҳам музокаралар жараёнидамиз ва буни ҳали тугатмадик», — деди у.

Боррел санкциялар таклифи «якуний қарор эмас, фақат таклиф» экани ва у муҳокама қилиниши кераклигини таъкидлади. «Ҳали келишиб олиниши керак бўлган бир қанча масалалар бор», — дея қўшимча қилди дипломат.

Боррел, шунингдек, норозилик намойишлари ва «Россияга қурол етказиб бериш» билан боғлиқ вазият туфайли Эронга қарши янги санкциялар қўлланилишини маълум қилди.

Россиянинг Украинадаги босқини бошланганидан бери ЕИ аллақачон саккизта санкция пакетини жорий қилган. Улар орасида Россия банклари, ишбилармонларига нисбатан чекловлар, кўмир импортини тақиқлаш, нефть эмбаргоси, экспорт чекловлари ва ҳоказолар бор. Politico нашрининг ёзишича, тўққизинчи пакет доирасидаги асосий чора ЕИ санкцияларига дучор бўлган шахслар рўйхатини кенг миқёсда кенгайтириш бўлиши мумкин.

Мавзуга доир: ЕИ Туркияни Россияга қарши санкцияларга риоя қилишга чақирди