Ангрен нефть базаси ҳудудида 10 декабрь куни сиғим сифонининг жўмраги ёрилиши оқибатида 11 минг 500 литр Аи-80 бензини тўкилиб кетган. Воқеа юзасидан корхона раҳбари Д.Азимов муносабат билдирган.

Мазкур авария ҳолатининг содир бўлиши бир қатор ижтимоий тармоқ фаоллари муҳокамасига сабаб бўлди. Жумладан, Олий Мажлис Қонунчилик палатаси депутати Расул Кушербаев масъулларга воқеа юзасидан бир қатор саволлар билан мурожаат қилди.

Расмий манбалар Ангрен нефть базасидан 11,5 минг литр бензин оқиб кетганини билдирмоқда. Бироқ биз негадир шу кунгача Ангрен нефть базаси ҳақида эшитмаган эканмиз. Масалан, биз Тошкент вилоятида  «Ўзбекнефтгаз»га қарашли Пахта, Кучлук, Чинобод нефтбазалари ҳақида биламиз. Нефть базаси кичкина корхона эмаски, уни кимдир сезмай қолса. Уни барпо этишда қатор талаблар, вақт, шу жумладан, экологик талаблар ҳам бор.

Бироқ Ангрен нефть базаси осмондан тушгандек бўлди. Шу боис агар очиқ ва шаффоф бўлишса, ваколатли идоралар қуйидаги саволларга жавоб беришларини сўраймиз: Ангрен нефть базаси қачон, қайси манбалар ҳисобига, нима мақсадда ташкил этилган? Ангрен нефть базаси бугун кимга қарашли? Ангрен нефть базасидаги АИ 80 бензини биржага сотувга чиқарилгандими? Ангрен нефть базасидаги АИ 80 бензини нима мақсадда сақлаб турилганди? Ангрен нефть базасидан оқиб кетган 11,5 минг литр бензин атроф муҳитга ва табиатга қанча зарар етказди?

Ангрен нефть базаси воқеаси катта ишларнинг бир учи эканлигини билиб турибмиз. Шу боис, расмий идоралар аниқ жавоб берса жамоатчиликда шубҳа бўлмайди. Дарвоқе, Давактив ҳам ўз йўналишида изоҳ бериши керак. Гап нима ҳақидалигини агентликнинг ҳушёр раҳбарлари тушуниб туришибди, деган умиддамиз», – деб ёзди депутат.

Журналист Муҳим Аъзамхўжаев Telegram’даги каналида воқеа тўғрисида кинояли пост қолдирди.

«11,5 минг литр бензин (салкам 70—80 миллион сўм) оқиб кетибди ва «ҳеч кимга жиддий зарар етказилмабди». Тўғри, давлат — ҳеч ким, у ҳеч қачон зарар кўрмайди», – деб ёзган журналист.

Блогер Нурбек Алимов авария сабаб оқиб кетаётган бензинни одамлар челакларда йиғиб олаётганидан ҳайратланганини ёзган.

Ангрен нефть базасида авария сабаб 11,5 минг литр АИ-80 бензини ерга оқиб кетгани айтилмоқда. Менга энг қизиғи, бу бензинни одамлар челак там чўмичларда бемалол йиғиб ўтиришгани бўлди. Бу жуда хавфли иш. Масалан, Танзанияда шу ҳолатда 56 нафар одам тириклай ёниб кетган, Нигерда ҳам 60 киши ёниб, кулга айланган. Мексикада бензин трубаси ёрилиб, у ердан бензин йиғаётган 135 нафар одам асфаласофилин бўлган. Покистонда эса ағдарилиб кетган бензавоздан текин бензин йиғиш илинжида бўлган 150 кишининг кули кўкка совурилиб кетган. Мана шунақа ҳолатлар бўлса, агар ҳаётингизни нархи қимматроқ бўлса, бир нарсадан қуруқ қолгандай югуриб бориб, «бензин движения» қилишга ҳаракат қилманг.

Албатта, юқоридаги ҳолатларнинг ҳаммаси ривожланмаган давлатларда бўлганини кузатиш мумкин. Одамлар ўз ҳаётини хавфга қўйиб бўлса-да чўмичда бензин йиғаётган ерда энергетик сиёсатда қандайдир йирик камчиликлар борлиги аниқ.

Бизда яхши, қурбонлар бўлмабди. Лекин бу иш барибир нотўғрилигича қолаверади. Бензин бу жуда хавфли ёнилғи. Нима бўлаётганини англамай ҳам қоласан, англашга миянг бўлмайди, у ҳавода кул шаклида учиб юрган бўлади... Мияни кулга айланиб қолмасидан олдин ишлатайлик», – деб ёзган блогер.

Telegram’даги «Компроматузб» каналида эса Ангренда нефть база йўқлиги ҳақида ёзилган.

«Ким кимни ва нима учун чалғитаётгани тушунарсиз? Ангренда Саноат энергетика гуруҳи МЧЖ ХК (собиқ «Жиззах петролеум» МЧЖ ХК)га қарашли йирик захира майдони бўлган Ангрен-Поп терминали бор, холос. Нефть база десак, халқ «Жиззах петролеум» ёки Саноат энергетика гуруҳи деган номлардан чалғийди деб ўйлашган, шекилли. Менинг тахминим катта эҳтимол билан бензин нархи ошса, қишда сотамиз, деб бензин ғамлашган, не тонгки, фалокат босиб оқиб кетди. Бу уларни фойдасига, энди бензин оқиб кетди, деб биржага бензин қўймай қўйишмаса бўлгани.

Ҳа мавзунинг асосийси бу эмас. Қандай қилиб давлат мулки хусусий бўлиб қолди? Ахир Ангрен—Поп темир йўлининг хусусийлаштирилгани бўйича Давлат активларини бошқариш агентлиги бирорта ҳам расмий маълумот берганига кўзим тушмади. Нима шартлар билан хусусийлаштирилган ёки ишончли бошқарувми? Ана энди тушундингизми корхонанинг номини айтмасдан Ангрендаги нефть база дейилаётганини? Аслида бу жой Саноат энергетика гуруҳи МЧЖ ХКнинг сақлов жойи.

Агар давлат корхонаси бўлганда «давно» раҳбарини олиб бориб қамашган бўларди, афсус! Балки ҳамон Давлат активларини бошқариш агентлиги эгалик қилар! Хуллас савол шу! Қандай қилиб бу йирик терминал Саноат энергетика гуруҳи МЧЖ ХКга бериб юборилди», – деб ёзган канал муаллифи.

Аввалроқ Давлат Экология қўмитаси бензин сизиб чиққан корхонада ҳовузлар белгиланган талаб даражасида бўлмаганини аниқлагани хабар қилинганди.