Сенатнинг 26-ялпи мажлисида «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги қонун маъқулланди. Бу ҳақда «Дарё» мухбири хабар бермоқда.

Сенат раиси Танзила Норбоеванинг таъкидлашича, мазкур қонун орқали ер участкалари масаласида аҳолини қийнаб келаётган муаммоларга барҳам берилади.

«Қонун давлат идоралари томонидан ўзбошимчалик билан ер участкаларини олиб қўйиш, бино ва иншоотларни бузиб ташлаш ҳолатларига чек қўяди. Асоссиз ‘снос’ларга барҳам берилади. Бундан буён ер участкалари жамоат эҳтиёжлари учун олиб қўйилишида мулк ҳуқуқининг устуворлиги, хусусий мулкнинг дахлсизлиги, очиқлик ва шаффофлик таъминланади», – деди Сенат раиси.

Қонунга кўра, ер участкаларини жамоат эҳтиёжлари учун олиб қўйилиши муносабати билан зарарларни ўрнини қоплаш бўйича республика ва ҳудудий даражада жамғармалар ҳамда компенсация комиссиялари ташкил этилади. Шу билан бирга, ер участкасини олиб қўйиш бўйича ташаббус маҳаллий кенгашларнинг мажлисларида ОАВ ва жамоатчилик вакиллари иштирокида очиқ кўриб чиқилади, натижалари эълон қилинади.

Маълум қилинишича, қонунда ер участкаларининг компенсация эвазига жамоат эҳтиёжлари учун олиб қўйилишига асос бўладиган ҳолатларнинг аниқ рўйхати кўрсатилмоқда. Ер участкаларининг ҳар қандай бошқа мақсадларда олиб қўйилишини жамоат эҳтиёжлари учун олиб қўйиш сифатида талқин этиш қатъиян та’қиқланмоқда.

Қонунда белгиланишича, бузилишга тушган ҳудудда жойлашган ерга бўлган ҳуқуқ мавжуд бўлмай туриб, 15 йил давомида кўчмас мулкка ҳалол, ошкора ва узлуксиз эгалик қилиб келган шахсларга ҳам ушбу кўчмас мулк объекти учун солиқлар тўлаб келингани тасдиқланган тақдирда, мазкур кўчмас мулк объекти қийматининг ўрни қопланади.

Қонун билан Қорақалпоғистон Республикаси Жўқорғи Кенгеси, халқ депутатлари маҳаллий Кенгашлари ҳузурида компенсация комиссиялари тузилиши белгиланмоқда. Мазкур комиссиялар компенсациялар ўз вақтида ва тўлиқ ҳажмда берилиши устидан мунтазам мониторинг ва берилган компенсацияларнинг ҳисоби юритилишини таъминлайди. Ҳужжатда жамоат эҳтиёжларига олиб қўйиладиган ер учун бериладиган компенсация турлари ва манбалари ҳам аниқ кўрсатилган. Хусусан, бериладиган компенсация турлари пул маблағлари, шу жумладан турар жойларни ва яшаш учун мўлжалланмаган жойларни вақтинчалик ижарага олиш учун пул маблағлари, бошқа кўчмас мулк объектини мулк қилиб беришдан иборат.