Чикаголик 104 ёшли аёл 4100 метр баландликдан сакраб, Гиннеснинг рекордлар китобидан дунёдаги энг кекса парашютчи сифатида жой олишни умид қилмоқда. 

Ўргатувчилар кекса Дороти Хоффнерга бортга чиқишга ёрдам беришди, шундан сўнг самолёт тўрт километрдан юқорироқ баландликка кўтарилди. Америкалик тажрибали парашютчи Дерек Бахтер билан тандемда сакрашни амалга оширди.

Тренернинг айтишича, сакрашдан олдин аёл ўзини хотиржам тутган. Хоффнер, "ёш шунчаки рақам" эканлигини қўшимча қилди ва унинг кейинги саргузаштлари ҳаво шарида сайр қилиш бўлишини таъкидлади.

Ҳозирча бу йўналиш бўйича рекорд 2022 йил май ойида парашютдан сакраган швециялик 103 ёшли Линния Ингегаард Ларссонга тегишли. Хоффнернинг сакрашини ташкил қилган компания ҳам Гиннеснинг рекордлар китобига америкалик ютуғини рекорд деб тан олишидан манфаатдор эканлигини билдирди.