Жорий йилнинг 27 январь куни соат 23:58 да Қарши шаҳар Фавқулодда вазиятлар бўлимига Қарши шаҳар “Хўжахиёл” МФЙ, “Қарлиқбоғот” кўчасида жойлашган савдо растасида ёнғин содир бўлди. 

Ҳолат юзасидан вилоят ФВБ маълумот тақдим этди. 

Маълум қилинишича, ёнғин содир бўлган манзилга 2 та ёнғин-қутқарув бўлинмаси 00.05 да етиб борган ва соат тахминан 00.33 ларда ёнғин тўлиқ ўчирилган.

Ёнғиндан  фуқаро Х.Б га тегишли енгил типда қурилган кичик ҳажмли савдо (савдо дўкони эмас) растасининг 6 метр квадрат ва унга ёндош “Қишлоққурилишбанк”га тегишли бўлган банкомат (нақт пул ечиш учун мўлжалланган хона) қурилмасининг 4 метр квадрат майдон қисми зарар кўрган.

Ёнғиндан ҳеч ким тан жароҳати олгмаган.

Ҳозирда ёнғин сабаби  ва зарари аниқланмоқда.

Шунингдек, ФВБ ёнғин ўчирувчиларга нисабатан бўлган норозилик фикрларига ҳам изоҳ берди. 

“Ёнғинни бартараф этиш учун аввало мутахассислар томонидан электр токини тармоқдан узилмагунга қадар, ёнғин-қутқарувчилари томонидан ёнғинни ўчиришга киришилмайди. Биринчи навбатда қутқарувчилар ва атрофдаги фуқароларнинг хавфсизлиги инобатга олинади.

Мазкур ёнғин жойида катта кучланишли электр токи борлиги сабабли ёнғинга сув беришни имкони бўлмаган. Шунга қарамай қутқарувчилар сув беришга уринган, натижада мавжуд электр токи қутқарувчиларга ўз таъсирини кўрсатган.

Маълум бўлишича, ушбу манзилдан ўтувчи электр линиясини асосий тармоқдан узиш учун электр мутахассислари томонидан қарийб 30 дақиқа вақт сарфланган.

Шу ўринда фуқароларимиздан вазиятни тўлиқ билмай туриб соҳа вакилларини  ушбу ҳаракатларини нотўғри талқин қилмасликларини сўраб қоламиз”, - дейилади хабарда.