Ўзбекистон, Тошкент – Batafsil.uz. Жиноятчилар Ўзбекистонга тамаки маҳсулотларини контрабанда қилишнинг янги схемасини ўйлаб топишган. Маҳсулотлар гўёки Тожикистонга транзит қилинаётгандек кўрсатилган, аслида эса улар республикамизда қолдирилган. Бу ҳақда мухбиримиз хабар бермоқда. 

“2023 йил 24 февраль куни “Авиаюклар” ташқи иқтисодий фаолият божхона постига Дубайдан товарлар билан юк олиб келинди. Улар орасида республикамиз орқали Тожикистонга транзит   қилиниши керак бўлган тамаки маҳсулотлари ҳам бор эди", - дея таъкидламоқда Давлат божхона қўмитаси матбуот хизмати.

Божхона расмийлаштируви жараёни якунлангандан сўнг тамаки маҳсулотлари юк машинасига ортилиб, Самарқанд вилоятидаги "Жартепа" чегара божхона постига юборилган. Автомобиль 28 феврал куни постга етиб борган.

Ҳужжатларга кўра, машинанинг юкхонасида 110 мингдан ортиқ сигарет қутиси, шунингдек,   чилим учун тамаки бўлиши керак эди. Бироқ, транспорт воситасини махсус ускуналар ёрдамида сканерлашда юк бўлими бўш эканлиги аниқланган.

Тергов давомида ҳуқуқ-тартибот идоралари ходимлари товарлар Самарқанд вилоятининг Булунғур туманидаги хусусий уйлардан бирига туширилганини аниқлашган. Бу ерда улар ҳужжатларга кўра Тожикистонга юборилиши керак бўлган тамаки маҳсулотларининг икки турини топишган. Бундан ташқари, уйнинг ҳовлисида турган “Кобальт” автомобилининг юкхонасида чилим учун мўлжалланган яна 3680 қути тамаки топилган. 

Агар ушбу маҳсулотлар Ўзбекистон бозорига кирганида эди, тўланмаган солиқлар ва йиғимлар туфайли давлат бюджетига етказиладиган зарар миқдори 1,5 миллиард сўмдан ошарди. Мусодара қилинган тамаки маҳсулотларининг қиймати 1,6 миллиард сўмни ташкил қилган.

Ушбу ҳолат бўйича жиноий иш қўзғатилган, тергов ҳаракатлари олиб борилмоқда.

Ўзбекистон бўйлаб янгиликлар: Telegram-каналга уланинг