Ўзбекистон, Тошкент – Batafsil.uz. Ўзбекистон Божхона қўмитаси Толибон томонидан қайтарилган ёқилғи Ўзбекистонда ишлаб чиқарилганлиги ҳақидаги маълумотни рад этган. Бу ҳақда мухбиримиз хабар бермоқда.

Эслатиб ўтамизки, аввалроқ Толибон миллий стандартлар бошқармаси ёқилғи сифати пастлиги сабабли Хайратон портидан тахминан 120 минг литр ҳажмдаги иккита нефть цистернасини Ўзбекистонга қайтаргани маълум бўлган эди.

Ўзбекистон Божхона қўмитаси матбуот хизмати қайтарилган нефть маҳсулотлари Ўзбекистонда ишлаб чиқарилмаганлигини аниқлаган.

"Икки танкерга юкланган 120 тонна ёқилғи Россиядан Афғонистонга жўнатилган ва мамлакатимиз ҳудуди бўйлаб транзит режимида ҳаракатланган", – дея тушунтирди Божхона қўмитаси.

Афғонистон томони ёқилғини қайтариб берганлиги сабабли, 2024 йил 6 апрелда танкерлар "Айритом” чегара божхона пости орқали Ўзбекистонга кириб келган.

Эслатиб ўтамизки, ўтган йилнинг август ойида Афғонистон сифати пастлиги сабабли нефть солинган 67та темир йўл цистернасини Ўзбекистонга қайтариш тўғрисида баёнот берган. Бунга жавобан "Ўзбекнефтгаз" расмий рад жавобини тақдим қилганди.