![Detail image](https://dnews.uz/img/assets_front/img/news/uzreport/uzreport669661a109fb7.jpeg)
Garet Sautgeyt Angliya terma jamoasi bosh murabbiyi lavozimini tark etdi, bu haqda mamlakat futbol federatsiyasi (FA) malum qildi.
Oxirgi Yevro-2024da Angliya terma jamoasi finalda Ispaniyaga 1:2 hisobida imkoniyatni boy bergandi.
Sautgeyt Angliya terma jamoasini 2016-yildan buyon boshqarib kelayotgandi, uning shartnomasi dekabrda yakuniga yetadi. Uning qo'l ostidagi jamoa ketma-ket ikki yevro finalda mag'lub bo'ldi, JCh-2018da yarim finalga, JCh-2022da chorak finalga chiqdi.
“Ingliz sifatida terma jamoada o'ynash va unga murabbiylik qilish sharaf edi. Bu men uchun hamma narsani anglatardi va men unga borimni berdim. Ammo o'zgarishlar va yangi bobning vaqti keldi. "Yakshanba kuni Berlinda Ispaniyaga qarshi kechgan final mening Angliya terma jamoasi bosh murabbiyi sifatidagi so'nggi o'yinim bo'ldi", dedi Sautgeyt.
Uning qo'l ostida Angliya termasi 102 uchrashuv o'tkazib, 61 g'alaba qozongan, 24 marta durang o'ynagan va 17 marta mag'lubiyat alamini totib ko'rgan. Sautgeyt Angliya terma jamoasi bosh murabbiyi sifatida tarixdagi g'alabalar soni bo'yicha uchinchi o'rinda, Alf Ramsay (69) va Uolter Uinterbottom (78) ko'proq o'yin o'tkazgan.
Angliya terma jamoasining Yevro finaldagi ikkala safari ham Sautgeyt boshchiligida bo‘lib o‘tdi, bunga avvalroq terma jamoada hech kim erisha olmagandi.
53 yoshli Sautgeyt bungacha “Midlsbro” va Angliya yoshlar terma jamoasini boshqargan.
Sautgeyt futbolchi sifatida "Kristal Pelas", "Aston Villa" va "Midlsbro" klublarida o'ynagan. U Angliya terma jamoasi safida 57 ta o‘yin o‘tkazgan va ikkita gol urgan, ikkita Yevropa chempionati (1996, 2000) va ikkita jahon chempionatlarida (1998, 2002) ishtirok etgan. Yevro-1996 yarim finalida Germaniyaga qarshi o'yinda Sautgeyt o'yinda hal qiluvchi penaltini amalga oshira olmadi.