O'zbekiston raqamli texnologiyalar vaziri Sherzod Shermatov boshchiligidagi mamlakatimiz delegatsiyasi amaliy tashrif bilan Janubiy Koreyada bo'lib turibdi, deb xabar qilmoqda "Dunyo" AA.

Delegatsiya tarkibidagi Xizmatlar eksportini rivojlantirish direktori Mahliyo Muksinova boshchiligidagi IT Park Uzbekistan vakillari WiseStone kompaniyasi asoschisi va bosh direktori Yong-Seok Li, WiseStone-T bosh direktori In-Suk Kim hamda KOIIA vakili Sung-Jom Lim bilan uchrashuv o'tkazdi.

Tomonlar bugungi kunda butun dunyo bo'ylab texnologik kompaniyalar duch kelayotgan muammolarni, xususan, kadrlar yetishmasligi va soliq yuklarini muhokama qildilar. Qolaversa, biznesni faol rivojlantirish yo'lidagi eng katta to'siq demografik omil hisoblanib, IT mutaxassislari bozori yildan-yilga kamayib bormoqda.

Uchrashuvda WiseStone vakillariga malakali mutaxassislar yetishmasligi muammosini hal etishning mumkin bo'lgan yechimi sifatida mamlakatning inson kapitali haqida batafsil ma'lumotlar taqdim etildi. IT Park vakillari Farg'ona viloyatini koreys tilining yuqori kirib borishi va rivojlangan infratuzilmasi tufayli kelajakdagi WiseStone ofisi uchun potensial joy sifatida ko'rib chiqishni taklif qildi.

Shuningdek, mehmonlarga IT Parkni qo'llab-quvvatlash dasturlari taqdim etildi. Ularda xorijiy kompaniyalarga minimal xarajat va IT Park tomonidan to'liq ko'mak bilan O'zbekiston bozoriga kirishga yordam beruvchi Zero Risk programmasi alohida qiziqish uyg'otdi.

Yong-Seok Li O'zbekiston bozori haqiqatan ham xorijiy IT sektor vakillari uchun jozibador bo'lib borayotgani haqida fikr bildirdi. Qo'llab-quvvatlash dasturlari mukammal, chunki ular faoliyatning deyarli barcha sohalarini qamrab oladi va boy inson kapitali bilan birgalikda biznesni kengaytirish uchun katalizatorga aylanadi.

WiseStone kompaniyasi vakillari yaqin vaqt ichida O'zbekistonga tashrif buyurishni va mamlakatimizning IT landshafti va kadrlar salohiyati bilan yaqindan tanishishni rejalashtirayotganini ma'lum qildi.

O'zbekistonga Sharqiy Osiyo tadbirkorlarining qiziqishi ortib borayotganini alohida ta'kidlash lozim. Birinchi chorak yakunlariga ko'ra, Janubiy Koreyaning 4 ta va Yaponiyaning 2 ta kompaniyasi IT Park rezidentiga aylanib, o'z faoliyatini yo'lga qo'ygan.

WiseStone kompaniyasi 2007-yilda o'z faoliyatini boshlagan. Janubiy Koreyaning eng yirik korxonalaridan biri bo'lgan ushbu kompaniyaning Xitoy va Vetnamda ham ofislari mavjud. WiseStone-T shtab-kvartirasi Seulda joylashgan IT shoʻba korxonasi bo'lib, u sinov xizmatlarini, moslashtirilgan texnologik yechimlarni sotishni, sifat kafolati va sifat nazorati bo'yicha konsaltingni taqdim etadi. Hozirda kompaniyada 400 dan ortiq xodim ishlaydi.